"23 сәуір — Ұлттық кітап күніне орай даярлық сынып оқушыларымен кітапханаға саяхат ұйымдастырылды. Мақсаты — кітапханамен таныстыру, кітапқа деген қызығушылықтарын арттыру, кітапты күтіп ұстауға үйрету.Бүгін даярлық сынып оқушылары кітапханаға саяхат жасады. Бұл олардың кітап әлемімен алғашқы танысуы болды. Кітапхана табалдырығын аттаған сәттен бастап балалар ерекше әсерге бөленді.Оқушыларды жылы қарсы алып, кітапхананың бөлімдерімен таныстырдық. Балалар кітап сақталатын сөрелерді, оқу залын көріп, әр кітаптың өз орны бар екенін білді. Сонымен қатар, кітапты қалай дұрыс пайдалану керектігі туралы мағлұмат алды.Саяхат барысында оқушылар кітаптың адам өміріндегі маңызы туралы әңгіме тыңдады. Кітап – білімнің қайнар көзі, ақылдың қазынасы екені түсіндірілді. Балалар кітапты ұқыпты ұстау, жыртпау, уақытында қайтару сияқты ережелермен танысты.Іс-шара барысында қызықты жұмбақтар жасырылып, балалар белсенді қатысты.Саяхат соңында оқушылар кітапхана туралы жақсы әсер алып, кітап оқуға деген қызығушылықтары артты. Кітап – адамның сенімді досы екенін түсінген балалар алдағы уақытта кітапханаға жиі келуге уәде берді."